A Consellería de Sanidade vén de informar que 3 traballadores da Residencia Bellavista Care de Nigrán deron positivo por coronavirus. Súmanse a outro traballador do centro situado na parroquia de Priegue, que xa estaba incluído no cómputo.
No que se refire á Residencia Vila do Conde de Gondomar, os datos mantéñense. A día de hoxe quedan 9 maiores e 4 traballadores contaxiados no centro situado na parroquia de Vilaza. Así mesmo, dez usuarias e usuarios faleceron con Covid-19, tres mulleres no Hospital Álvaro Cunqueiro de Vigo e un home e outras seis usuarias na propia residencia.
Os datos actualizados este mércores arroxan un total de 99 maiores usuarios de residencias e 118 traballadores contaxiados en Galicia. No que respecta aos centros para persoas con discapacidade, non hai ningún caso positivo entre os usuarios e 4 traballadores contaxiados.
