Despois de máis dunha década de mal funcionamento da estación de bombeo de A Torre, en Chaín, e despois de levar gastado neste tempo en reparacións e limpezas máis de 100.000 euros, sen contar o consumo eléctrico, dende Manifesto Miñor-En Marea consideran que chegou o momento de afrontar o problema con racionalidade e unha solución alternativa á actual, eliminado a estación de bombeo e que as augas fecais caian por gravidade. Por iso, presentan unha moción para reclamar actuacións eficientes por parte do Concello de Gondomar.
“A construción dunha estación de bombeo á beira do Río de Morgadáns, no barrio de A Torre en Chaín, foi a consecuencia dunha pésima xestión tanto na elaboración do proxecto coma na construción das obras de saneamento promovidas pola Xunta de Galicia a primeiros do ano 2000 ao seu paso pola zona indicada. Asemade, a pouca dilixencia de quen entón gobernaba no Concello de Gondomar por permitir unhas obras de difícil execución, tanto pola orografía do terreo como polos problemas cun determinado veciño, deron como resultado unha solución cara e ineficaz como se ten demostrado até hoxe coa devandita estación de bombeo”, recorda Antonio Araújo.
“A semana pasada, coas primeiras chuvias do Outono, o bombeo de A Torre volveu vomitar ao Río de Morgadáns toda a carga ponzoñenta das tubaxes que baixan de Morgadáns, Chaín, etc. Dicimos ponzoñenta e tamén deberiamos dicir incívica, pois dentro do espectáculo lamentable de contaminación e fedor, destacaban especialmente os plásticos, cueiros, compresas, etc”, lamenta Araújo. Dende Manifesto Miñor non é a primeira vez que se ten reclamado unha campaña informativa, casa por casa, para lle informar á veciñanza do que se pode ou non se pode botar polos sumidoiros. “Ás veces cómpre repetir aquilo que, sendo obvio, dámos por sabido e non é tal”, conclúe o concelleiro de Manifesto Miñor-En Marea.
