“Running Polo Camiño, Unha Suorenta Comedia”, no Auditorio de Baiona

Created with GIMP

De Ste Xeito Produccións e o seu espectáculo “Running Polo Camiño, Unha Suorenta Comedia” fará parada este sábado día 12 de setembro ás 20:00 horas no Auditorio V Centenario do Concello de Baiona. Proxecto cultural promovido pola Rede de Dinamización Lingüística, o Xacobeo 2021, Turismo de Galicia e a Xunta de Galicia dentro do plan Fondo X21 e do Concello de Baiona.

Xulia e Román acaban de coñecerse e o primeiro WhatsApp non tarda en chegar: “Quedamos? Veña si! Pero cando?”.

Fillas e fillos de parellas anteriores. Nais divorciadas. Avós na residencia. Adolescentes co pavo. O pequeno coa crise dos 8. Os grandes coa dos 40, coa dos 50, coa dos 60. Clases de ioga para liberar o estrés, patinaxe artístico os luns, danza jazz os martes. E ser taxista. Das fillas, dos fillos, das fillas dos demais, do pai, da nai, da avoa, dos primos. E os deberes. Os deberes da escola e o resto de deberes. Deberes e obrigas. Coidar de todo e de todos menos dun mesmo. Como facer que as axendas cadren? E por outra banda: de verdade quero comezar algo novo que poida supoñer máis deberes e menos pensar nun mesmo?

Romeo e Xulieta tiñan as familias na contra dun amor prohibido. Xulia e Román aínda non saben se tanto se queren, pois as súas familias, as súas vidas, e os seus propios medos impiden brindar con esa primeira cervexa que podería facer nacer ou morrer o amor eterno.

En escena, Sergio Macías e Stephy Llaryora, que terán que suar a camiseta para meterse na pel de todas as personaxes desta vertixinosa comedia, un total de 20.