Nos seis primeiros meses do ano, Povisa investiu máis de 1,2 millóns de euros tanto en equipamento como na reforma das súas infraestruturas. Desta cantidade, a metade materializouse durante o mes de xuño, unha vez concluíu a etapa máis complicada da pandemia.
Respecto ao equipamento, o hospital dotouse na práctica totalidade dos servizos de tecnoloxía de última xeración que reforzará a existente. Entre ela, destaca a incorporación de novos ecógrafos, sistemas de monitoraxe, esterilizadores, densitómetros, padiolas de transporte e quirófano, mesas cirúrxicas, monitores e desfibriladores, entre outros.
No que respecta ás infraestruturas, está a acometerse a reforma do servizo de Urxencias, que finalizará en setembro, e tamén a modernización das instalacións e o equipamento tecnolóxico da Escola Universitaria de Enfermería. Ao mesmo tempo, está a actuarse na área de hospitalización, coa adquisición de máis dun centenar de camas que están a substituír de forma progresiva ás actuais, dentro do proxecto de renovación integral das habitacións de todo o complexo. Todas estas obras están a levarse a cabo mediante fases para evitar que interfiran no normal desenvolvemento da actividade asistencial.
Por outra banda, no segundo semestre do ano concentrarase a maior parte do investimento anunciado no mes de xaneiro polo conselleiro delegado de Ribera Salud. O plan estratéxico do grupo sanitario no seu primeiro ano á fronte de Povisa está dotado con 4 millóns de euros para modernizar as infraestruturas, renovar o equipamento tecnolóxico e reforzar os sistemas de información do hospital.
