Moreira exhíbese no primeiro triunfo do Vigo-Rías Baixas na Copa de España

A Copa de España non puido ter este domingo un mellor inicio para o Vigo-Rías Baixas na localidade estremeña de Don Benito. Mauricio Moreira outorgou á entidade presidida por José Luis Chamorro a primeira vitoria da súa historia no certame estatal máis prestixioso da categoría Elite e Sub-23. O ciclista uruguaio impúxose en solitario na liña de meta do Circuíto Guadiana tras un espectacular ataque na última subida ao Alto de Magacela. Ademais, o conxunto que dirixe Marcos Serrano tamén logrou a primeira posición na táboa por equipos.

A exhibición do gañador na parte final dos 171 quilómetros de percorrido culminou o traballo realizado polos seus compañeiros. Primeiro, o Vigo-Rías Baixas soubo defender ao seu líder nun intento de abanico executado polo equipo Lizarte.

Os corredores flúor non se viron sorprendidos por esa ofensiva e posteriormente asumiron o mando do pelotón para recortar a diferenza de Mario Aparicio. O ciclista do Gomur, que chegou a gozar dunha vantaxe de cinco minutos formando parte dun cuarteto de escapados, empezou fuxido en solitario a última das catro voltas ao circuíto.

O Vigo-Rías Baixas achegou ao gran grupo á cabeza de carreira e Moreira xogoulla nas ramplas de Magacela. O charrúa atacou nunha explosiva ascensión de pouco máis de mil metros e cunha pendente media do 11%. Ninguén puido seguilo e coroou en segunda posición por detrás de Aparicio, a quen adiantou e soltou de roda no descenso, dentro xa dos últimos 20 quilómetros.

Por detrás, estableceuse un cuarteto perseguidor que non tivo opcións de dar caza ao xefe de filas da estrutura olívica. Moreira voou sobre o chairo na aproximación a Don Benito para levantar os brazos con máis dun minuto de marxe e asinar un tempo de 4:01:18.

O pelotón, con catro representantes do Vigo-Rías Baixas, terminou pisándolle os talóns ao cuarteto intermedio. Edwin Torres obtivo a 12ª praza, Dani Viejo a 19ª, Guillermo Mallo a 58ª e Asier González a 70ª. O triunfo por equipos tampouco se lles escapou aos pupilos de Serrano que subiron ao podio para recoller o trofeo como gañadores.

A camisola de líder que recibiu Moreira tocaralle defendela o vindeiro domingo en Sumidoiro (Murcia), onde se disputará o XXIX Trofeo Guerrita – Memorial Juan Romero e Diego Sánchez, segunda das once probas puntuables da Copa de España 2020.

Anuncios