A historia de Galicia, protagonista do desfile escolar de Entroido en Panxón

O CPI Arquitecto Palacios de Panxón deu este venres o pistoletazo de saída ás festas do Entroido. Dentro do seu proxecto anual “Cultura que Conta” establecéronse os disfraces para o desfile que tivo lugar polas rúas de Panxón, xunto co Centro de Educación Infantil “As Dunas”.

Os castrexos encabezaban o desfile acompañados dunha carroza con un castro, seguía a comparsa  dos romanos, a carroza do Arco Visigótico cos alumnos disfrazados dos pobos xermánicos, peregrinos, un barco vikingo, xograres e trobadores, nobreza medieval, os irmandiños, emigrantes… Toda a historia de Galicia reflectida en cada unha das comparsas.

Todo rematou coa degustación de sobremesas  elaboradas polas familias e a queima do Meco (aínda que foi indultado). Unha perfecta forma de entrar nestes días de troula.

Anuncios