Concello de Nigrán, Comunidade de Montes de Chandebrito e Asociación de Veciños “O Castro” inauguraron esta mañá ao carón do “Bosque da Memoria” a peza realizada polo colectivo “Arte no Queimado” con motivo do segundo aniversario dos incendios na parroquia e que leva por título “Rexurdimento”.
Baixo a dirección de Remigio Davila, os escultores Rosendo González e Juan Coruxo elaboraron a partir de cachos de madeira calcinados aportados pola veciñanza uns pulmóns de 3 metros de altura dos que brota unha árbore. Os artistas quixeron deste xeito expresar a gran catástrofe medioambiental que supuxo o lume pero tamén a oportunidade que brindou para construír un futuro en harmonía coa natureza. Unha placa cun texto reflexiona precisamente sobre estes aspectos.
A escultura foi situada nun punto simétrico co Castro de Chandebrito, con vistas panorámicas cara a ría de Vigo e ao carón do coñecido xa como “Bosque da Memoria”, onde precisamente figura unha escultura deste colectivo realizada con motivo do primeiro aniversario e que representa a un home cun caldeiro tratando de apagalo, símbolo da loita da veciñanza.
Tratouse dun acto sinxelo que comezou ás 11:30 horas no que descubriuse un texto de Remigio Davila que fai referencia á traxedia de outubro de 2017 e unha placa ao pé da escultura. Fíxose ademais unha pequena camiñada dende este punto ao Bosque da Memoria, ao Banco do Encontro e ás escavacións do Castro de Chandebrito, o que crea un espazo cultural único. Finalizou cun viño de felicitación de inicio do ano no bar Tenda D’Arriba .
