Mañá xoves, día 3 de outubro, o Monte Real Club de Yates acollerá unha nova edición da iniciativa “Amar o mar”, que se celebra en colaboración coa Consellería de Política Social co obxectivo de achegar o mar a grupos de persoas ás que a práctica das actividades náuticas póidalles significar unha mellora na súa calidade de vida.
Durante a xornada, que comezará ás 12:00 do mediodía, os participantes no “Amar o mar”, que nesta ocasión virán do Centro de Atención a Persoas con Discapacidade de Redondela e a Residencia Nosa Señora dos Milagres de Ourense, visitarán as instalacións do club baionés e sairán a navegar pola baía ata as proximidades das illas Cíes.
A visita contará coa presenza de José Ignacio Martínez, Xefe de Servizo de Dependencia e Autonomía persoal da Xunta, e Concepción Vara, concelleira de Servizos Sociais, Mobilidade e Accesibilidade do Concello de Baiona. Ambos estarán acompañados polo presidente do MRCYB, José Luis Álvarez, e o vicepresidente, Alejandro Retolaza.
