Nigrán mellora o abastecemento no Seixo antes de asfaltar esta rúa e outras catro de Panxón

O Concello de Nigrán vén de renovar por completo a condución do abastecemento de auga na contorna do Camiño do Seixo (Panxón) como paso previo ao asfaltado desta e outras catro vías da parroquia cun investimento total de 54.050 € ao cargo do Plan Concellos 2019.

Así, o Concello de Nigrán e a concesionaria Aqualia remataron a pasada semana as obras de substitución das canalizacións na contorna de Lagoa-Seixo beneficiando así a 25 vivendas que, dende hai anos, sufrían o prexuízo de ter continuas roturas nas tubaxes por un defecto das mesmas. Este camiño e o de Lousas, Pastora, Redonda e Arribas Brancas serán pavimentados ao longo do mes de setembro pola empresa Fechi S.L. como parte do plan de asfaltados do Concello de Nigrán para a mellora da seguridade viaria na parroquia.

Así, en todos os casos se realizará unha limpeza do pavimento da calzada e das cunetas antes de melloralo cunha mestura bituminosa en quente estendida e compactada, ademais de facer en cada caso o recrecido das tapas da rede de sumidoiros.

“Trátase de camiños en moi mal estado e que dan servizo a moitas persoas, por iso os consideramos prioritarios neste segundo plan de asfaltados da parroquia, sendo conscientes de que quedan outros pendentes que non esquecemos”, sinala o alcalde, Juan González. Así, anteriormente en Panxón foi asfaltado Jesús Espinosa, Gondomar, Area Alta, Camiño da Area, Arquitecto Palacios, Paraviñal, Camiño da Fonte, Porqueira ou rúa do Rial.