Vigo e Baiona asinan as primeiras vitorias do Trofeo Baitra

FOTO: ROSANA CALVO // Yago Marquina tras vencer en Optimist A.

O Monte Real Club de Yates e o Real Club Náutico de Vigo asinaron as primeiras vitorias do Trofeo Baitra de Vela Infantil, que esta fin de semana dispútase en Baiona baixo a organización do club de iates baionés e co patrocinio de Baitra Accesorios Navales.

Na primeira xornada de regatas, celebrada este sábado no interior da baía de Baiona, os novos regatistas, de entre 8 e 15 anos anos, xogáronse os liderados provisionais en tres probas na baía de Baiona. Fixérono con condicións complicadas, sobre todo polo vento, que soprou cuns 16 nós de media pero que alcanzou picos de ata 21 nós por momentos.

A dureza destas condicións fixo que o comité de regata decidise deixar en terra aos regatistas máis novos, da Clase Escola, que están aínda iniciándose no deporte da vela. Si saíron á auga os regatistas de Optimist A, B e C, e deron espectáculo demostrando a súa valía nos percorridos entre boias deseñados para o campionato.

Na clase Optimist A, o vencedor foi o regatista de 13 anos do Monte Real Club de Yates, Yago Marquina, que realizou un fantástico traballo na auga. Tras as tres probas celebradas, levantouse á primeira posición deixando o segundo e terceiro posto a Rubén de Ramón, do Club Marítimo Carrumeiro; e ao seu compañeiro de club, Lucas Albaladejo.

Na clase Optimist B, o vencedor foi o regatista sub-13 do Real Club Náutico de Vigo, Roque Tourón-Figueroa. Pablo Marquina do Monte Real Club de Yates e Jorge Astiazaran do Real Club Náutico de Vigo quedaron segundo e terceiro respectivamente.

En Optimist C, o Real Club Náutico de Vigo copou os tres postos de honra do podio provisional, que ocupan Pedro Vecino, no máis alto; Paco Riveras e Luis Wizner.

O Trofeo Baitra de vela infantil continúa mañá domingo coa segunda e última xornada de probas e a posterior entrega de premios aos gañadores, nas instalacións do Monte Real Club de Yates. Nela participarán directivos do club organizador e tamén estará presente o xerente de Baitra, Juan Carlos González, como patrocinador do evento.

Anuncios