O Monte Real Club de Yates súmase un ano máis á celebración da Festa da Arribada organizando saídas en veleiro para gozar dos grandes festexos de Baiona, declarados de interese turístico internacional.
Todos aqueles que o desexen, sexan ou non socios do club, poderán saír a navegar a vela pola baía baionesa os días venres 1, sábado 2 e domingo 3 de marzo, podendo gozar dos espectáculos da Arribada desde o mar.
Serán saídas de 2 horas de duración. Durante a primeira hora, os tripulantes, acompañados por un patrón do Monte Real, poderán percorrer a baía de Baiona e gozar da emoción de navegar a vela.
Na segunda hora poderán escoller entre seguir navegando polas augas da baía ou colocarse nas proximidades da praia Ribeira para ver os espectáculos da Arribada ou o ambiente da vila.
Todas aquelas persoas interesadas en reservar praza ou solicitar máis información poden poñerse en contacto co club enviando un correo electrónico a secretaria@mrcyb.com ou chamando por teléfono ao 986 385 000.
O prezo de cada saída é de 25 euros por persoa (20 euros para socios do MRCYB) e en cada barco poderán saír un máximo de 6 persoas.
Ademais das saídas nos veleiros do club, o Monte Real Club de Yates ofrecerá, durante os días da Arribada, descontos do 20 por cento nos seus amarres a todas aquelas persoas que teñan barco propio e queiran achegarse navegando a Baiona.
As actividades que o Monte Real Club de Yates organiza con motivo da Arribada forman parte da programación anual da Escola de Vela do club na que, ao longo de todo o ano, ofrécense cursos de vela lixeira para nenos e de vela cruceiro para adultos.
Escapadas ás Illas Cíes, seráns en veleiro, actividades de Team Building ou programas para empresas son outras das moitas propostas que o Monte Real ofrece a todos aqueles que queiran gozar do mar en Baiona.
