Anuncios
Ticker de novas

O gondomareño Brais Misa, vencedor do Dúatlon Concello de Poio

FOTO: FEGATRI // Os podios feminino e masculino, na súa chegada a meta.

Brais Misa (Arcade Inforhouse Santiago) e Aída García (Club Ciclismo Tríatlon Poio) proclamáronse este domingo vencedores da primeira competición da tempada en Galicia, o Dúatlon Concello de Poio. Esta proba, con 130 inscritos, forma parte do Circuíto Galego de Dúatlon e é clasificatoria para o Galego.

A proba masculina estivo moi competida ata o remate no que houbo pleno do Arcade Inforhouse, que colocou a tres homes no podio. Nos dous primeiros sectores, moita igualdade cun grupo de cinco homes (Brais Misa, Gustavo Santiago Rodríguez, Cristian Muíño, Jacobo Crego e Cristóbal Dios) nunha apertada loita por estar en cabeza e con xente moi preto tentando alcanzalos. Así se chegou ao terceiro segmento con todo por decidir. Brais Misa (Arcade Inforhouse Santiago) logrou impoñerse na liña de meta (54:10) con escasos segundos sobre o seu compañeiro de club, Gustavo Santiago Rodríguez (54:16). O terceiro posto foi para o tamén deportista do Arcade, Cristian Muíño, que tamén chegaba moi preto (54:28).

Na categoría feminina Aída García logrou o triunfo grazas a un magnífico sector de bicicleta no que logrou escaparse en solitario e marcar unha importante diferenza coas súas perseguidoras. Despois, no último tramo da carreira a pé, só tivo que manter as distancias para chegar a meta na primeira posición cun tempo final de 1:04:04. O segundo posto foi para María González (Artrogal-Tri 498) que foi xunto a Aída ata que esta rompeu a proba na bicicleta. María fixo o mellor parcial no terceiro segmento e logrou a segunda posición cun tempo de 1:05:52. María Lois (Arcade Inforhouse Santiago) pechou o podio cun tempo de 1:10:18.

As e os participantes tiveron que facer 5 quilómetros de carreira a pé, 20 quilómetros en bicicleta e remataron con 2,5 de carreira nun día soleado. A saída, meta e transicións estaban situadas no porto do Campelo.

O Circuíto Galego de Dúatlon 2019 está formado por 4 probas (Concello de Poio, Cidade de Lugo, Cidade de Vigo e Cidade de Santiago), que son clasificatorias para o Campionato Galego, que se celebrará en Riveira o día 7 de abril. En cada unha das probas clasifícanse 22 deportistas para o Galego.

Anuncios