Despois de subir ao máis alto do podio Elite nas dez primeiras xornadas da Copa Galicia de Ciclocrós, o excepcional refacho de Adrián Valverde chegou ao seu fin este domingo en Carral. O baionés do Club Ciclista Rías Baixas terminou segundo da súa categoría na undécima proba puntuable, unha cita na que o representante da estrutura presidida por José Luis Chamorro deu un paso máis cara ao título final.
A carreira de Carral disputouse o día despois de que as condicións meteorolóxicas convertesen en épico o V Ciclocrós Concello de Dumbría. A auga acumulouse da maneira que se pode observar na fotografía que acompaña este texto. Nun circuíto impracticable nalgúns tramos, Valverde impúxose entre os Elite e ocupou a cuarta praza na clasificación absoluta.
O de Baiona abonouse ao cuarto posto absoluto durante a fin de semana. O domingo en Carral repetiu posición, pero nesta ocasión entre os tres primeiros meteuse un elite. Jorge Punzón (Prebetong) finalizou terceiro, avantaxando en 29 segundos ao miñorano.
A falta de seis xornadas para a conclusión da Copa, Valverde goza de máis de 300 puntos de colchón respecto a Punzón. A próxima carreira celebrarase o domingo que vén en Viveiro.
