A soprano viguesa Begoña Salgueiro e o tenor madrileño Javier Lassaletta ofrecerán este mércores 29 de agosto unha Gala Lírica ás 22:00 horas na Praza do Concello de Baiona, incluída no programa cultural e de lecer Baiverán 2018 organizado pola Concellería de Cultura.
Begoña Salgueiro comeza a cantar a moi temperá idade, trasládase a Madrid e posteriormente a Italia. Ten o privilexio de formarse con artistas de gran prestixio como M. Caballé, R. Scotto, N. Argenta, M. Shirai ou M. Zanetti. Completa a súa formación artística cos directores de escena S. Gonella (Teatro Piccolo de Milán) S. Langridge (The Royal College de Londres) e G. do Monaco. O seu repertorio abarca ópera, zarzuela, oratorio, lied, canción de concerto e mesmo música contemporánea debido á versatilidade da súa voz realizando roles tanto de soprano como de mezzosoprano.
Javier Lassaletta nace en Madrid. Inicia os seus estudos musicais na escola Sotomesa de Madrid. Despois de ingresar con tan só 19 anos na Escola Superior de Canto de Madrid, comeza os seus estudos vocais con A. Olaria e I. Ribadeneira. Perfecciona a súa técnica vocal con C. Charlan e realiza estudos co mestre J. Granadeiros. Trasládase a Verona (Italia) onde se forma con F. Gibin e colabora coa “Fundacion Arena di Verona”. Participa no Teatro Communale na tempada invernal nos roles de Remendado e Cavardossi nas óperas Carmen de G. Bizet e Tosca de G. Puccini, respectivamente. Posúe unha voz lírico-spinta robusta e timbrada que lle permite afrontar diferentes rexistros e roles.
