No regreso da Volta a Salamanca ao calendario Elite e Sub23 o Club Ciclista Rías Baixas pisou o podio final. Antonio “Chava” Angulo adxudicouse a camisola da montaña, unha clasificación na que a estrutura presidida por José Luis Chamorro contou con tres corredores entre os cinco mellores escaladores. Ademais, a formación do Val Miñor quedou preto do triunfo na última etapa con Francesc Zurita terminando cuarto na capital charra.
A combatividade foi o aceno de identidade dos pupilos de Iván Rodríguez nesta rolda. Na cuarta e última etapa (Santa María de Tormes-Salamanca, de 115 quilómetros) o Club Ciclista Rías Baixas volveu estar representado na escapada do día, do mesmo xeito que sucedera nas anteriores xornadas. Nesta ocasión, Antonio Barbero fuxiuse xunto a outros sete corredores.
O andaluz e os seus compañeiros chegaron a gozar dunha vantaxe próxima ao minuto e medio, pero nunha etapa moi rápida o pelotón anulou todos os intentos que buscaban evitar unha chegada masiva a Salamanca.
Zurita, o ex profesional catalán do conxunto flúor, meteuse no sprint final e ocupou a cuarta praza. O ciclista de Blanes cruzou a liña de meta a 1 segundo de Iñigo Rodríguez (Aldro), que sorprendeu aos favoritos ao triunfo nas rúas salmantinas.
Tras unha etapa sen portos puntuables, Angulo subiu ao podio para recoller o premio como gañador da montaña. O cántabro recibiu a camisola de mans de Laudelino Cubino, un dos mellores escaladores da historia do ciclismo español. “Chava” dominou esta clasificación con 17 puntos, avantaxando en 9 ao segundo clasificado, o seu compañeiro de equipo Ignacio Zamanillo. Outro integrante da escuadra miñorana, Sergio Álvarez, concluíu quinto con 6 puntos.
