O Campionato Galego de Rallies aumenta o seu nivel de actividade antes do verán, e apenas dúas semanas despois do Rally de Narón, os equipos desprázanse ao sur de Pontevedra, concretamente á fronteira con Portugal, para tomar parte na quinta carreira, organizada como de costume pola Escudería Suco.
A carreira, que adopta o nome de Memorial Ismael Gregorio (en recordo de quen foi membro activo desta escuadra organizadora, e que perdía a vida a principios deste ano) celebrarase enteiramente ao longo do sábado 7, cun percorrido de 420 quilómetros, e algo máis de 113 disputados contrarreloxo, ao longo de once tramos cronometrados.
Alberto Meira, copilotado por José Murado, será como de costume un dos equipos protagonistas, e favoritos á loita polo triunfo. Tras o terceiro podio cultivado recentemente nos tramos de Ferrolterra, o equipo amarelo quere seguir apontoando as súas opcións á conquista do terceiro título galego. Meira apunta que “os tramos son, polo xeral, similares aos de edicións anteriores, xa que se percorren máis ou menos as mesmas zonas, aínda que con algunhas novidades interesantes, como un curioso tramo en bucle, que será o último do rali e supón unha idea absolutamente inédita nos ralis galegos. Non teño ningunha dúbida de que o equipo organizador de Escudería Suco vai sacar todo adiante coas garantías que o fixo ata agora. Só queda confiar en que o público responda, en todos os sentidos, e vivamos un excelente fin de semana de carreiras”.
Para seguir o rally
VENRES 6 XULLO
Verificacións de 16:30 a 21:30
Parque de asistencia situado en Salvaterra do Miño
SÁBADO 7 XULLO
Saída rally ás 7:00 desde Parque da Canuda en Salvaterra do Miño
Tramo A – “Talleres Olimar” ás 8:02 e 11:46
Tramo B – “Electricidade Condado” ás 8:43 e 12:27
Tramo C – “Transportes Augusto” ás 13:17 e 16:59
Tramo D – “Talleres Sermiño” ás 18:27 e 21:20
Tramo E – “Electrogranxa” ás 18:57 e 21:50
Tramo F – “Bucle Salvaterra” ás 22:22
Fin do rally ás 22:37 en Parque da Canuda en Salvaterra do Miño
Resultados en directo en… www.temposfga.eu
