Arranca o prazo de inscrición para o Campus de Tenis do Concello de Nigrán

O Concello de Nigrán, coa colaboración dos clubs do municipio, organiza desde finais de xuño a mediados de agosto seis campus deportivos orientados a nenos e adolescentes. O prazo de inscrición para participar no segundo deles, o campus do Club de Tenis Nigrán, xa está aberto. Os interesados deben anotarse na Oficina de Turismo de Panxón en horario de 10:00 a 14:00 e de 16:00 a 20:00 horas ou na Oficina de Información Cidadá do Concello de 9:00 a 14:00 horas. O campus desenvolverase nas pistas municipais Dunas de Gaifar do 2 ao 6 de xullo de 10:00 a 14:00 horas e repetirase do 16 ao 20 de xullo, tendo un custo de 60 €.

Todos teñen un custo de 60 euros (excepto o do Club Baloncesto Nigrán, de 45 €) e unha duración de catro días, existindo nalgúns a posibilidade de empregar servizo de coidador para ampliar horario e permitir mellor conciliación familiar. As inscricións comezan 15 días antes do inicio de cada campus.

Os campus están orientados a un público infantil e adolescente e arrancan o día 26 de xuño con Surf a cargo de Prado Surf e a continuación, do 2 ao 6 de xullo, será o do Club de Tenis Nigrán (que se repite do 16 ao 20 de xullo). Os restantes van sucedéndose ao longo de todo o verán sen solaparse: baloncesto (Club Baloncesto Nigrán, do 9 ao 13 de xullo), fútbol sala (Panxón Nigrán F.S., do 23 ao 27 de xullo), multideporte e animación (do 30 de xullo ao 3 de agosto), e finalmente fútbol (E.D.Val Miñor, do 6 ao 10 de agosto). O Concello achegará a merenda diaria para cada participante e a cobertura do seguro.