Nigrán comezou cos preparativos para a noite de San Xoán e na tarde de onte unha decena de operarios iniciaron os traballos de blindaxe do ecosistema dunar. Colocarán un total de 700 metros de valos de dous metros de altura aínda que deixarán un corredor de acceso ao areal. Paralelamente e co fin de disuadir aos que tenten invadir a zona acoutada, ao longo desta xornada procederán á instalación de potentes focos para facilitar a visibilidade da zona aos axentes do Seprona. O alcalde, Juan González, asegurou que esta medida é moi efectiva e por iso repiten como noutras edicións.
Debido a que as fogueiras de San Xoán coinciden en sábado, desde o consistorio desenvolveron un protocolo de seguridade máis estrito que en anos anteriores e como novidade as tradicionais orquestras actuarán detrás do pavillón, e non no porto como viñan facendo ata o momento. Esta modificación mellorará a seguridade dos asistentes e dos músicos que tiñan que despregar os seus escenarios pilotando parte dos mesmos no areal, “cos riscos que leva”, matizou o alcalde. Por outra banda as rúas de Panxón permanecerán abertas ao tráfico aínda que investindo o sentido de circulación da rúa Arquitecto Palacios, o último tramo deste viario cortarase a vehículos a partir das 21:30 os tres días para deixar espazo ás actuacións que se desenvolverán no aparcadoiro ata as 3:30 da madrugada. A rúa Cidade de Vigo permanecerá pechada.
O hospital de campaña montarase no mesmo día ao tratarse dunha estrutura inchable. “É un sistema bastante novo e que permite ter as instalacións operativas en pouco tempo, comezarán ao redor das 21 horas do sábado”, explicou González. O punto de concentración para os Corpos e Forzas de Seguridade así como Protección Civil, que este ano superarán o centenar, será as 23:30 no pavillón municipal.
Unha vez que se dea por finalizada a celebración será a quenda dos operarios de limpeza municipais e da concesionaria Cespa, que traballarán xuntos froito do operativo especial. Medio centenar de profesionais comezarán ás 6:30 da madrugada para desaloxar os areais e a limpar a contorna para que todo volva á normalidade canto antes.
