Catro persoas detidas en Baiona polo roubo nun domicilio na Guarda

A Garda Civil detivo onte a catro individuos, dous croatas e dous italianos, como presuntos autores dun roubo que cometeran o mesmo día nun domicilio na localidade da Guarda.

As detencións producíronse, escasas horas despois do roubo, no transcurso dun dos controis de estrada que tiñan establecido os efectivos do Posto Principal da Garda Civil de Baiona-Nigrán na estrada PO-552, á altura de Cabo Silleiro.

O nerviosismo dos catro ocupantes dun vehículo, con placas de matrícula francesas, ao pasar polo chanzo de selección do dispositivo puxo en alerta aos integrantes do control que optaron por realizar un exhaustivo rexistro, tanto dos ocupantes como do vehículo.

As sospeitas non tardaron en confirmarse xa que dentro do turismo atopáronse xoias e diñeiro cuxa procedencia non puideron xustificar. Nun pano de pescozo escondido debaixo do asento dianteiro dereito, levaban varias xoias e moedas; no interior dun calcetín que se atopou no oco portaobxectos do asento traseiro, escondíase outro lote de xoias e noutro calcetín que escondían no interior do cinceiro situado na consola central, atopáronse algo máis de 200 euros en moedas de dous euros.

Os catro ocupantes do vehículo foron inmediatamente detidos ao ter coñecemento de que tanto as xoias como o diñeiro foran subtraídas durante a mañá dese mesmo día no interior dun domicilio habitado na localidade da Garda, nun momento no que non había ninguén na vivenda.

Trátase de catro homes, dous de nacionalidade croata e dous italianos, en idades comprendidas entre os 18 e os 29 anos, a maior parte deles cun amplo historial delituoso. Ningún deles ten domicilio coñecido en España e sábese que levaban poucos días aloxados nun apartamento, no municipio de Sanxenxo.

A todos eles acúsaselles dun delito de roubo con forza nas cousas en casa habitada e outro de pertenza a un grupo criminal. O condutor do vehículo foi investigado, tamén, por un delito contra a seguridade viaria por carecer de permiso de conducir.

Con estas detencións a Garda Civil considera desarticulado un perigoso grupo itinerante, recentemente chegado a España procedente de Francia que, sen dúbida, dado os antecedentes e o perfil dos arrestados, pretendía operar na provincia de Pontevedra.

Os detidos foron postos onte a disposición do Xulgado de Instrución de garda de Tui que decretou o ingreso preventivo de todos neles en prisión.