Anuncios
Ticker de novas

Escolares de Baiona aprenden a predicir o tempo vendo as nubes

FOTO: CONCELLO DE BAIONA // Inauguración da exposición "Paseo polas nubes".

Esta mañá a Oficina de Turismo de Baiona acolleu a inauguración dunha exposición moi peculiar con motivo do Día Meteorolóxico Mundial que ten por título “Paseo polas nubes”. Na mostra pódense ver varias imaxes das nubes tomadas na nosa Vila. As instantáneas tomadas foron realizadas polo alumnado de 4º da ESO de Educación Plástica Visual e Audiovisual do CPI de Cova Terreña de Baiona baixo a supervisión de Elsa Liliana Vázquez Lorenzetti, profesora de EPeV, e Loreto Raya González, coordinadora do proxecto.

Pero as nubes retratadas non son unhas nubes calquera, son coas que o alumnado aprendeu a predicir o tempo como o facían outrora os nosos avós. Os profesores explicaron aos alumnos técnicas para que á hora de observar as nubes saiban se van chover ou non.

Ao acto de inauguración acudiron o Alcalde de Baiona, Ángel Rodal, a Concelleira de Educación, Beatriz González, e a directora de colexio, Isabel Martínez, ademais das coordinadoras do proxecto e os alumnos e alumnas implicados. Desde o centro pediron ao Concello un espazo para que o alumnado dese a coñecer os seus traballos. A Concelleira de Educación, que tamén é responsable da área de turismo, pensou que a oficina de turismo municipal era un bo sitio para acoller as bonitas imaxes. Así poderán ser visitas ademais de por os propios veciños do municipio, por un gran número de visitantes que pasarán pola oficina. Poderase gozar da exposición ata o 23 de abril.

A exposición englóbase dentro do Plan MeteoEscolas, un dos moitos proxectos nos que participa o CPI de Cova Terreña de Baiona. Neste proxecto participa alumnado de ESO dos 4 niveis educativos (1º, 2º, 3º e 4º), formando un equipo interdisciplinar co profesorado do centro.

ESCOLARES DE BAIONA APRENDEN A PREDICIR O TEMPO VENDO AS NUBES

FOTO: CONCELLO DE BAIONA // Inauguración da exposición “Paseo polas nubes”.

Anuncios