A primeira competición oficial de carácter nacional en Galicia celebrarase este domingo en Santiago de Compostela e Vigo, cos respectivos Trofeos Deputación onde 129 patinadores a patinadoras farán unicamente o programa curto para todas as categorías, tanto masculinas como femininas, aínda que tanto a Benxamín como a Sénior non terán presenza en Vigo.
A sección de Patinaxe do Coruxo FC organiza no Pavillón Municipal de Coruxo o Trofeo Deputación de Pontevedra cos Júnior, Xuvenil e Cadete competindo na mañá do domingo de 11:00 a 13:45 e Alevín e Infantil de 16:30 a 18:15 horas, contando cunha participación de 51 inscritos. En ambos casos, ao remate de cada sesión, farase a entrega de trofeos.
O Club Patinaxe Artística Gondomar acudirá ao campionato con seis patinadores, Andrea López na categoría Júnior, Sofía Costas en Infantil e Sara Ferreira, Ainhoa Vidal, Lola Álvarez e Joel Ribeiro en Alevín.
