Anuncios
Ticker de novas

Buscan xogadores para crear un equipo de fútbol gaélico no Val Miñor

FOTO: KELTOI FG VIGO // Un encontro de fútbol gaélico do club vigués.

Un grupo de xogadores do Keltoi FG de Vigo, da Liga Galega de Fútbol Gaélico, vencellados ao Val Miñor e co ánimo de fomentar o deporte nacional irlandés, promoven a creación dun club de fútbol gaélico en Gondomar co afán de que sexa para toda a comarca.

Os interesados en contactar poden facelo a través do correo electrónico turoniansvalminhor@gmail.com ou do Facebook Turonians Val Miñor. Os adestramentos, que comezarán o próximo 2 de abril, serán todos os luns no Campo Municipal das Cercas en Gondomar de 21:30 a 23:00 horas.

“A intención é ir vendo como evolucionan os adestramentos, se hai xente e compromiso o obxectivo é tirar para adiante e constituír un club para xogar a liga galega”, sinala Gonzalo Amorín, un dos promotores.

O fútbol gaélico (chamado en irlandés Peil Ghaelach ou Caid) é unha variante do fútbol xogado principalmente en Irlanda, sendo o deporte de máis popularidade dese país xunto co Hurling. Xógase en equipos de 15 xogadores nunha cancha de céspede rectangular con porterías en forma de H en ambos os dous lados. O obxectivo principal é anotar puntos pateando ou golpeando o balón coas mans e introducilo na portería rival. O equipo con máis puntos ao final do encontro gaña. Os xogadores avanzan polo campo levando o balón nas súas mans, pateándoo e pasándoo entre compañeiros de equipo.

Anuncios