Anuncios
Ticker de novas

Concello e empresarios de Baiona fan un balance positivo da Arribada

FOTO: CONCELLO DE BAIONA // A Praza do Bo Xantar ateigada de xente.

O Alcalde de Baiona, Ángel Rodal, e as concelleiras de Cultura e Turismo, María Iglesias e Beatriz González, reuníronse cos responsables dos distintos departamentos municipais que colaboraron na organización da XXIII edición da Festa da Arribada co obxectivo de facer un balance do acontecido durante os tres días, e coa intención de repasar e mellorar aspectos que se terán en conta para edicións futuras.

Nesa reunión destacouse o excelente traballo realizado polos servizos municipais do departamento de Cultura, de Vías e Obras, Electricidade, Limpeza, Policía Local e do resto de efectivos pertencentes ás Forzas e Corpos de Seguridade do Estado que estiveron despregados eses días en Baiona, dando cobertura tanto á regulación do tráfico, ás emerxencias e en xeral a toda a seguridade cidadá que requiriu a Festa da Arribada.

Agradeceuse tamén a implicación de todos os sectores empresariais, culturais, deportivos e sociais da vila que estiveron á altura das circunstancias a pesar do tempo. Analizáronse os testemuños de moitos postos e establecementos cuxos resultados foron óptimos e mellores do que se esperaba e tomouse nota dos fallos e erros que deberán ser analizados e mellorados no futuro.

En canto á programación da Arribada, dicir que se executou case ao 100% fóra da representación de teatro que a última hora do domingo e por motivos climatolóxicos tívose que suspender. Durante os dous días, os baioneses e visitantes puideron gozar activamente da multitude de actividades programadas para a ocasión e unha vez máis o tempo non impediu que a Festa da Arribada desenvolvésese con total normalidade.

Rodal e Iglesias tamén se reuniron esta mañá con representantes do empresariado da Vila para coñecer a súa opinión acerca desta XXIII edición. Os empresarios fixeron un balance positivo da celebración e destacaron que a Arribada conta cun gran número de incondicionais que veñen gozar da celebración en calquera circunstancia. Tamén sinalaron que, a pesar das previsións meteorolóxicas, que auguraban un forte temporal, o tempo respectou bastante a celebración e que a festa se desenvolveu con gran afluencia de público. A modo de exemplo relataron que foron varios os locais e postos do Real Mercado Medieval que esgotaron as súas existencias antes de que comezara a choiva intensa a tarde do domingo. A Arribada deixou unha gran cantidade de diñeiro na vila de Baiona e axuda a desestazionalizar a chegada de visitantes, todo iso de vital importancia para o empresariado.

Nos días sucesivos á festa medieval, os operarios municipais están inmersos nas tarefas de desmonte e recollida de atrezo típico da Arribada e dos postos que forman parte do Real Mercado Medieval.

En canto á limpeza de rúas, o Concello reforzou os dispositivos de limpeza e recollida de residuos, deseñando un operativo específico para a festa medieval. Unha vez que finalizada a recollida do atrezo e os postos, pasou tamén a varredora mecánica polas diferentes zonas.

A montaxe e o desmonte dunha festa como a Arribada non é tarefa fácil, pero grazas á coordinación, organización e ao dispositivo despregado de operarios e limpeza a principios da semana próxima semana a Real Vila volverá ao seu estado habitual e non haberá ningunha pegada do medievo nas súas rúas e prazas. A XXIII Festa da Arribada tan só quedará no imaxinario de baioneses e visitantes que xa están a pensar na celebración de 2019.

Anuncios