Anuncios
Ticker de novas

Os campións do mundo de 420 participarán este fin de semana en Baiona no Trofeo Baitra

Os principais clubs náuticos de Galicia desprazarán este fin de semana ata Baiona aos seus equipos de 420 para disputar o Trofeo Baitra, unha competición impulsada polo Monte Real Club de Yates na que se darán cita os mellores regatistas da clase.

Entre eles estarán, entre outros, o vigués Martín Wizner e o pontevedrés Pedro Ameneiro, que o pasado mes de xaneiro coroáronse en Fremantle (Australia) como campións do mundo sub 17 da clase 420. Tamén veremos sobre a auga ao equipo formado por Jorge Enríquez e Guillermo Núñez, gañadores da anterior edición do Trofeo Baitra.

Sanxenxo, Vigo e Rodeira son os clubs que máis regatistas desprazan a Baiona, onde se reunirán máis de medio centenar de deportistas con idades comprendidas entre os 15 e os 18 anos. Participarán tamén no trofeo equipos de Portosín e Oza, así como do propio Monte Real Club de Yates.

As tripulacións participantes navegarán en frota e medirán as súas forzas en seis regatas que o comité encargado da organización repartirá, dependendo de como se porte a meteoroloxía, entre as xornadas do sábado e do domingo. A día de hoxe as previsións indican que haberá bo vento para regatear, de dirección norte e máis de 12 nós de intensidade.

Na entrega de premios, prevista para o domingo ás cinco da tarde, participará o xerente de Baitra, Juan Carlos González, que un ano máis se consolida como un dos principais impulsores da vela de base en Galicia a través do patrocinio de diferentes competicións e eventos.

Estarán tamén presentes o alcalde de Baiona, Ángel Rodal; o presidente da Federación Galega de Vela, Manuel Villaverde e varios directivos do Monte Real.

Ademais de ter clasificación propia, o Trofeo Baitra, de carácter clasificatorio para a categoría, seguirá definindo o ránking de 420 da Federación Galega de Vela.

Anuncios