Gondomar Concello Aberto denuncia que recentemente a Biblioteca pechouse os sábados pola mañá de xeito permanente, horario no que abría habitualmente e que resultaba de gran utilidade tanto para a poboación estudantil do concello que volve na fin de semana para a súa casa, como para as familias que aproveitaban o sábado para ir a coller libros ou a desfrutar dun rato de lectura. “Agora, como isto non fose pouco, aparece un cartaz no que se anuncia o peche da mesma do 18 de decembro ao 8 de xaneiro polas tardes”, critica Jimena Varela.
“Por suposto, como é habitual, o anuncio faise en perfecto castelán, e isto non é ningunha casualidade. Tanto a expulsión de Espazo Lectura, como este peche e o desprezo polo noso idioma son parte do mesmo desdén por unha política cultural de calidade que mantén este goberno. Detrás das luces de Nadal, os actos espectaculares e o confeti, non hai absolutamente nada, e do que había, cada vez hai menos. A nosa poboación estudantil quédase sen Biblioteca Municipal en plena época de exames de fin de cuatrimestre, pero iso si, teñen o Auditorio Municipal aberto de luns a luns ata as nove da noite para ver o Belén. Cuestión de prioridades”, conclúe a concelleira de CABE.
