Pérez Rumbao Car, a destacada firma automobilística concesionaria de Audi e Volkswagen convértese en provedora dos vehículos oficiais do Trial das Nacións, proba deportiva que no mes de setembro reunirá aos mellores pilotos por selección de países do mundo na vila de Baiona.
A posta en escena da firma do convenio produciuse esta mañá nas instalacións que Pérez Rumbao Car rexenta na Avda. de Madrid de Vigo, concesionario oficial das marcas Audi e Volkswagen, sendo a súa Directora Xerente, Isabel Abelleira, quen rubricaba en nome da empresa de automóbiles, e José Durán en calidade de presidente da Peña Moteros Val Miñor, organizadores do gran evento intercontinental.
Con este xesto, Audi e Volkswagen serán os acenos de identidade de marca dos coches oficiais que trasladarán aos membros da FIM (Federación Internacional de Motociclismo), pilotos, Xuíces e Xurados do Trial das Nacións, na súa chegada ao aeroporto de Vigo e estación do ferrocarril, tendo como base operativa o recinto do Parador de Turismo “Conde Gondomar” de Baiona.
