Un total de sesenta nenos participarán este ano nos Campamentos Urbanos de Verán do Concello de Baiona. A actividade é totalmente gratuíta e está organizada polas Concellerías de Cultura e Xuventude.
Os Campamentos Urbanos celébranse cada ano no municipio de Baiona para ofrecer a posibilidade de que os nenos e nenas empreguen o seu tempo libre estival participando en actividades de forma organizada e planificada, a través de actividades de calidade, promovendo a corresponsabilidade, a cooperación, a educación en valores, coñecendo os espazos públicos municipais, e fomentando a convivencia entre os rapaces empadroados e os rapaces que teñen no concello a súa segunda residencia.
Para a celebración das actividades, dedicadas a nenos de entre 5 e 11 anos, establecéronse dúas quendas: do 14 ao 31 de xullo (agás o 18, e 25 de xullo, por ser festivos) e 1 ao 14 de agosto. Os horarios son de luns a venres de 10.30 a 13.30 horas e hai 30 prazas por quenda.
Durante o campamento desenvólvese un programa de actividades de lecer e tempo libre previamente programado. Así hai xogos de cooperación, visitas á Carabela Pinta e a Virxe da Rocha, realizan un tramo do Camiño pola Costa, unha festa temática cada fin de quenda, etc. A recepción dos participantes sempre terá lugar na Praza do Concello.
