Miles de fieis alagan este martes Gondomar para mostrar a súa devoción ao santo “máis milagreiro”. No día grande das festas patronais, veciños e visitantes honran a San Bieito, para pedirlle a súa intercesión ante calquera problema de saúde.
Desde as 7:00 ata as 21:30 horas celébranse continuas misas que enchen o templo parroquial durante toda a xornada. A solemne celebrouse ao mediodía, seguida da procesión acompañada pola Agrupación Musical de Belesar, que ofreceu ademais un pasacalles e un concerto.
Como di a tradición, os devotos ofrecen aos santo ovos, que se teñen que pedir de casa en casa, xa que non vale compralos, aceite ou exvotos. Os ovos póñense á venda, e o aceite, despois de ser bendicido, distribúese en pequenos frascos e ofrécese aos devotos a cambio da vontade, para aplicalo nas zonas con problemas de pel ou para facer desaparecer verrugas. O que sobra destínase ás familias máis necesitadas.
Pola noite, a encargada de animar a festa será a Orquestra Trovadores.