Anuncios
Ticker de novas

252 axentes reforzarán a Garda Civil e a Policía Nacional en Galicia durante o verán

FOTO: DELEGACIÓN DO GOBERNO // Villanueva, Vázquez e Alonso na presentación do Plan Turismo Seguro 2017.

O delegado do Goberno en Galicia, Santiago Villanueva, presentou esta mañá o Plan Turismo Seguro 2017, que arrancará o próximo 1 de xullo. Foi nun acto celebrado na sede da delegación do Goberno, que contou coa presenza do Xefe Superior de Policía de Galicia, Manuel Vázquez, e do Xeral Xefe da 15 zona de Garda Civil, Ángel Alonso. Tamén estiveron presentes o subdelegado do Goberno na Coruña, Jorge Atán e o xerente do Plan Xacobeo, Rafael Sánchez Bargiela.

O Plan Turismo Seguro ten como obxectivo informar os visitantes das medidas que deben ter en conta para evitar ser vítimas de delitos e extremar a prevención nos lugares de maior afluencia turística, que no caso de Galicia son principalmente as zonas costeiras, o camiño de Santiago e a contorna da catedral compostelá.

Tal e como lembrou o delegado do Goberno, “aínda que a seguridade ao 100% non se pode garantir, si se pode asegurar que se poñen todos os medios dispoñibles para achegarnos o máximo posible a un resultado de total satisfacción”. Neste sentido, o Plan de Turismo Seguro prevé dispositivos de seguridade especial e temporal, con reforzo de efectivos naqueles lugares onde resulten necesarios pola gran afluencia de persoas.

“Van reforzar as medidas de seguridade en todo o territorio galego, e por suposto este despregamento terá como obxectivo evitar o aumento dos niveis de delincuencia”, sinalou Villanueva que destacou que o traballo será especialmente significativo en puntos como “Santiago de Compostela, o Camiño de Santiago e zonas costeiras, sobre todo na provincia de Pontevedra”. Neste sentido lembrou que “en 2016 percorreron o Camiño 277.854 peregrinos”.

MEDIOS HUMANOS

Un total 252 axentes reforzarán os persoais galegos durante os meses de xullo e agosto. Deles, 170 pertencen á Garda Civil e 82 á Policía Nacional. Estes axentes son parte dos 2.639 que se distribuirán en toda España entre aquelas comunidades que reciben unha maior afluencia de turistas durante a tempada estival e que se suman aos persoais xa existentes. Isto supón un incremento respecto das cifras de 2016 cando se despregaron 1.227 axentes en toda España dos cales 93 estiveron en Galicia.

Os reforzos dos corpos e forzas de seguridade repartiranse entre as catro provincias galegas. Así para A Coruña están destinados 75 axentes; para Lugo irán 29; a Ourense 39 e para a provincia de Pontevedra desprazaranse 88 axentes. A todos estes sumásense outros 21 axentes distribuídos en helicópteros e do Grupo de Reserva e Seguridade (GRS).

MEDIOS MATERIAIS

Entre as unidades que este verán despregásense no territorio galego estarán reforzados equipos de policía xudicial; TEDAX; escuadróns de cabalería; do SEPRONA; de seguridade cidadá; GRS e helicópteros.

Os equipos que traballasen en xullo e agosto teñen entre os seus labores ademais de reforzar a seguridade dar protección no percorrido do Camiño de Santiago e colaborar na loita contra os incendios.

Ademais da atención a pé de rúa que ofrecerán os axentes, nos centros de recepción de turistas haberá carteis informativos e vídeos ilustrativos, en castelán e en inglés, que incluirán os teléfonos e puntos de contacto aos que se pode acudir en caso de necesidade.

Xunto á presentación dos medios que se despregasen nesta tempada Santiago Villanueva lembrou a necesidade da cooperación cidadá e lembrou que “está posto a disposición do público non só os teléfonos de asistencia e os postos físicos tanto de Policía Nacional como de Garda Civil así como doutros axentes. Tamén se pode empregar a aplicación para teléfonos móbiles que permite un contacto directo coas forzas e corpos de seguridade: Alertcops, que ademais incorpora a posibilidade de comunicarse a través do chat en máis de 100 idiomas. “Ante o mínimo signo dun posible caso de atraco hai que recorrer aos medios dispoñibles”, insistiu o delegado do Goberno.

A seguridade é un dos motivos máis valorados á hora de que os turistas escollan España como destino vacacional. “Os nosos esforzos están orientados a que isto siga sendo así”, concluíu o delegado do Goberno.

Anuncios