Usuarios do Centro de Educación Especial Juan María recibiron hoxe os diplomas acreditativos de asistencia aos seminarios de Educación Vial 2016/2017 impartidos pola Policía Local de Nigrán coa colaboración da Dirección Xeral de Tráfico.
En total, cen usuarios deste centro acudiron ás clases teóricas e prácticas levadas a cabo no mes de maio empregando karts eléctricos da Dirección Xeral de Tráfico (DXT), co apoio tamén da Asociación DisCamino, que prestou os seus triciclos e bicicletas adaptadas, e o GES, que amosou os diferentes vehículos de emerxencia (como o camión de bombeiros).
Os centros educativos de Nigrán beneficiáronse ao longo do mes de maio de clases teóricas e prácticas completamente coordinadas, deseñadas e impartidas desde a Policía Local coa colaboración de DXT, que cede os recursos para un circuíto. Mantense así un traballo que este corpo iniciou no curso 2013/2014 impulsado polo propio inspector xefe José Manuel Vázquez.
