O Diario Oficial de Galicia (DOG) publica hoxe a contratación por procedemento aberto do aluguer de 143 vehículos para as brigadas antiincendios. Trátase da renovación do contrato polo que se subministran os distintos tipos de coches nos que se executan as labores de prevención e defensa contra os lumes e que se distribúen polos distritos forestais de Galicia.
O procedemento divídese en tres lotes. O primeiro deles inclúe 82 vehículos todoterreo pick-up con motobomba e sistema dosificador de retardante que serían utilizados durante un mínimo de 48 meses. O segundo lote é doutros 57 coches do mesmo tipo pero por 36 meses e o terceiro lote é de catro vehículos todoterreo de sete prazas durante 36 meses.
O importe de licitación total é de 7,4 millóns de euros, IVE incluído, e o prazo de presentación de ofertas remata o 26 de xuño.
