A Garda Civil detivo a un veciño de Nigrán, como suposto autor de varios roubos cometidos durante os últimos meses na mesma localidade. Atribúeselle a comisión de cinco roubos, todos eles labores no mesmo edificio no que vivía.
As investigacións iniciáronse a finais do mes de agosto do ano pasado cando o Posto Principal da Garda Civil de Baiona-Nigrán recibe senllas denuncias polos roubos que se cometeron en dous trasteiros dun mesmo edificio, situado nunha céntrica rúa de Nigrán. Nun dos trasteiros gardábanse 63.000 euros en metálico, que foron subtraídos, e no outro se denunciou a falta dun teclado de música, un traxe de neopreno e unhas aletas, entre outros obxectos.
As pescudas levadas a cabo polos efectivos do Posto de Baiona-Nigrán leváronlles a sospeitar dun veciño do mesmo edificio que xa fora detido por un roubo no interior dun vehículo estacionado na mesma rúa.
A pesar de que as indagacións realizadas poñían de manifesto que desde que se cometeu o roubo nos trasteiros esta persoa saldara unha serie de débedas que tiña contraídas, a maior parte por consumo de drogas, e que ademais levada un ritmo de vida superior ao que viña sendo habitual, non foi posible ata agora a obtención de probas ou indicios suficientes para a súa imputación.
As probas incriminatorias que levaron á detención de A.P.A., de 22 anos, como presunto autor, obtéñense cando este mes prodúcense outra serie de roubos no mesmo inmoble. Nesta ocasión púidose comprobar que accedeu ao interior de dous consultorios médicos onde subtraeu diverso material clínico. Nun dos consultorios entrou dúas veces, unha a principios de mes e a segunda o pasado día 24 (luns). Tamén se lle considera autor do roubo perpetrado o día 23 (domingo) no interior doutro vehículo que estaba estacionado na mesma rúa.
As investigacións realizadas permitiron, ademais, a recuperación dos obxectos que foran subtraídos no interior deste último vehículo, un trade e unha radial, que se atopaban escondidos nun monte próximo ao domicilio do detido. A maior parte do resto dos efectos recuperáronse nun establecemento de compra venda de obxectos usados da comarca.
O arrestado pasará durante a mañá de hoxe a disposición do Xulgado de Instrución de garda de Vigo.
