Sanxenxo, Portonovo, Beluso, Bouzas, Vigo ou Baiona son algúns dos clubs que terán representación no Trofeo Comunica que se celebra este sábado na ría de Vigo baixo a organización do Monte Real Club de Yates e coa colaboración do Real Club Náutico de Vigo e a Federación Galega de Vela.
A falta de que se peche o prazo de inscrición, que permanecerá aberto ata unha hora antes de que comece a proba, son xa 25 os barcos que conforman a listaxe de participantes. Tripulacións formadas por uns 130 regatistas que se disputarán o trofeo a bordo de cruceiros, monotipos J80 e Fígaros.
Todos escoitarán o sinal de saída ás dúas da tarde fronte ao peirao de transatlánticos de Vigo. Tras superar unha boia de desmarque, iniciarán un percorrido que lles obrigará a pasar por outras dúas balizas máis, a da Negra, ao norte das illas Serralleiras; e a de Carallones, ao sur, na entrada á baía de Baiona. Dependendo do trazado escollido, serán entre 12 e 14 millas e media antes de cruzar a liña de chegada.
Un percorrido atractivo para unha xornada na que as previsións meteorolóxicas anuncian boas condicións para navegar, sobre todo na ría de Vigo, con sol, unha temperatura agradable e ventos do oeste-noroeste que soprarán cunha intensidade de entre 8 e 12 nós. Na baía de Baiona, xusto ao final do percorrido, a situación complicarase algo, con ventos máis irregulares e frouxos.
Se todo vai segundo o previsto, a navegación será áxil e a frota chegará a Baiona con comodidade en apenas unhas horas. Unha vez finalizada a competición celebrarase a entrega de premios aos gañadores. Será ás sete da tarde nas instalacións do Monte Real Club de Yates, con asistencia de representantes da xunta directiva do club e de Comunica, a empresa patrocinadora.
