Anuncios
Ticker de novas

Jose Abalo será o segundo director do Club Ciclista Rías Baixas

FOTO: CLUB CICLISTA RÍAS BAIXAS

O corpo técnico do Club Ciclista Rías Baixas contará esta tempada con Jose Abalo como segundo director. Este graduado en Ciencias da Actividade Física e do Deporte exerceu a pasada campaña de axudante en prácticas de Marcos Serrano e neste 2017 consolidará as súas funcións dentro da estrutura presidida por José Luis Chamorro.

Con pasado como corredor en diferentes clubs da provincia, Abalo está a encargarse durante este inverno de supervisar os datos dos adestramentos de cada ciclista. O seu traballo completa o de Serrano e o do preparador Óscar García, profesor da Facultade de Ciencias da Educación e do Deporte: “Os adestramentos en bicicleta lévaos Marcos e os mozos envíanme a min os datos para que eu vexa como evolucionan e que fai falta modificar. Óscar supervisa todo isto e traza a liña para seguir”.

“A miña misión é axudar ao equipo e, sobre todo, a Marcos para que el poida desenvolver a súa función ao 100%”, explica Abalo, que asumiu un dos traballo de pretempada: “A preparación no ximnasio están a levala a cabo comigo. Os ciclistas veñen tres días á semana á facultade e alí realizan os exercicios baixo a miña supervisión. Esta parte deséñaa Óscar e ata que el non dá o visto e prace non se executa”.

Ao longo do curso, e ao posuír o título de Director Deportivo Nivel III, tamén lle tocará poñerse ao volante: “Na próxima concentración sacarei aos rapaces para adestrar porque Marcos estará na Copa de España cunha parte do equipo e se nalgún momento da tempada tócanos dobrar eu irei con algún dos dous grupos. Serrano vai ensinando cousas para formarme como director”.

A súa chegada ao Club Ciclista Rías Baixas produciuse mercé ao convenio entre a Universidade de Vigo e a entidade miñorana. Abalo traballa con “o propósito de aprender o máximo de todos os membros do staff. En poucos ou ningún sitio tense ao teu lado xente como a deste club. Tentarei aproveitar ao máximo a oportunidade que me brindou a directiva e o corpo técnico”.

Anuncios

Deja un comentario

Tu dirección de correo electrónico no será publicada.