O Auditorio Municipal de Nigrán acollerá do 23 ao 25 de febreiro a exposición “Arte por Palestina”. A mostra conta coa participación de máis de 40 artistas plásticos e colaboración de preto doutros tantos artistas, músicos e poetas, algunhas e algúns afeccionados, outras profesionais e mesmo artistas de recoñecido renome como R. Úbeda, J.M. Barreiro, Caino, M. Lence, X. Costa, P. del Palacio, Y. Herranz, J. Pastor, A. Cerviño, E. Gómez-Dahlgren e moitos outros.
A exposición e venda de obra doada durará toda a fin de semana e estará amenizada por un evento musical cada día, cunha interesante mestura de músicas diversas e poesía. O acto inaugural do venres 23 ás 20:00 horas contará coa actuación da Orquestra de Cordas do Torreiro de Priegue, o dúo AcevedosDelgados de música de fusión e o rock dos Three Roosters, ademais da lectura de poemas.
No evento musical do sábado teremos ao dúo Vaghetti-Montero de microrrelato e guitarra, a lectura de Betheléem, Premio Nacional de Poesía de Nadal e a actuación dos profesores de canto e piano, Pilar e Arabel Moráguez. O domingo, en función de vermú, será a quenda da Zumba, cunha master class de zumber@s solidari@s (donativo 5 euros).
Os organizadores chaman a toda a poboación solidaria co pobo palestino a asistir, gozar das distintas formas de arte, que teñen conquerido reunir, e comprar obra orixinal dos artistas. Os fondos recadados serán destinados a paliar as necesidades das nais e nenos de Gaza a través da UNRWA (Axencia de Nacións Unidas para os refuxiados de Palestina en Oriente Próximo), e por tanto gozan de desgravación fiscal de entre 40% e o 80% do donativo.
