Correos admitiu preto de 59.000 votos por correo para as Eleccións ao Parlamento de Galicia

Correos admitiu un total de 58.903 votos por correo de cidadáns e cidadás para as Eleccións autonómicas ao Parlamento de Galicia que se celebrarán o vindeiro domingo, 18 de febreiro, segundo a seguinte desagregación por provincia de destino:

Este número de votos por correo supón un 19,96% menos que a cifra total de votos admitidos nas anteriores eleccións galegas celebradas durante a pandemia, o 12 de xullo de 2020 (73.595), que marcou récord histórico nuns comicios autonómicos en Galicia; e un 36,97% máis que o número de votos por correo rexistrados no proceso homólogo anterior, celebrado o 25 de setembro de 2016 (43.002). Correos lembra que se admitiron 62.831 solicitudes de voto por correo para as eleccións galegas. Correos puxo ao dispor dos solicitantes o 100% das documentacións electorais, ben mediante a súa entrega en man no domicilio ou mediante o seu aviso para ser recollidas nas oficinas de Correos. Os votos emitidos representan o 93,74% das solicitudes admitidas, un cociente de conversión similar ao rexistrado en anteriores procesos electorais autonómicos en Galicia (94,2% en 2020 e 91,9% en 2016).

Todos os recursos de Correos ao servizo do proceso electoral

Correos puxo todos os recursos organizativos, tecnolóxicos, loxísticos e humanos necesarios para garantir o cumprimento das obrigacións de servizo público que lle son encomendadas nos procesos electorais. Entre as medidas organizativas adoptadas, Correos realizou 450 contratos de reforzo, tanto para oficinas como para a repartición de envíos e as tarefas necesarias nos centros loxísticos. Ademais, Correos aplicou outras medidas como a apertura extraordinaria durante os festivos locais de Entroido e mércores de Cinza da práctica totalidade das súas 166 oficinas postais en Galicia e outros 160 puntos de atención rurais todo iso para axilizar e facilitar ao máximo á cidadanía o voto por correo. Igualmente, Correos está a facer o máximo esforzo para coordinar a rede loxística postal e despregar todos os medios necesarios para conseguir que os votos admitidos en calquera dos seus puntos de atención ao público en toda España ata o día de onte, sexan entregados o vindeiro domingo na mesa electoral correspondente.

Despregamento loxístico especial para a xornada electoral do 18-F

Para a xornada electoral do 18 de febreiro, Correos ten encomendada a misión de entregar os votos cursados por correo nas mesas electorais. Para iso, Correos establecerá un despregamento loxístico especial, integrado por 2.349 profesionais, entre persoal de repartición, oficinas e centros de tratamento, e mobilizará todos os vehículos da súa frota que sexan necesarios para o correcto desenvolvemento da súa misión. Cando se abran os locais electorais, un primeiro equipo de persoal da empresa postal pública entregará os votos en custodia nas 3.950 mesas electorais distribuídas nos 2.347 locais electorais dos 313 municipios de Galicia. Outro grupo de empregados e empregadas fará chegar ás mesas electorais aqueles votos por correo que puidesen recibirse durante o transcurso da xornada. Por último, outro equipo recollerá o denominado “terceiro sobre”, cunha copia do resultado do escrutinio, das mesas electorais de todos e cada un dos colexios electorais de Galicia.

Tarxetas censuais e propaganda electoral

A colaboración de Correos nas Eleccións autonómicas ao Parlamento de Galicia do 18 de febreiro, esténdese tamén á repartición das tarxetas de inscrición no censo e aos envíos de propaganda electoral, ademais das comunicacións a membros das Mesas Electorais nos municipios cos que hai acordo, envío aos Concellos da lista do censo, recollida de documentación o día das eleccións etc. Correos xa distribuíu as 2.217.089 tarxetas censuais remitidas polo Instituto Nacional de Estatística aos fogares dos cidadáns con dereito a voto o 18 de febreiro, nas que figuran os datos da súa inscrición no censo, así como o colexio e a mesa de votación correspondente.

Ademais, Correos repartiu os envíos de propaganda electoral dos diferentes partidos e coalicións que concorren aos comicios. Todas elas son obrigacións de servizo público que Correos ten encomendadas por ser o operador designado polo Estado para prestar o Servizo Postal Universal en España. En definitiva, Correos adoptou desde a convocatoria das Eleccións autonómicas ao Parlamento de Galicia do 18 de febreiro todas as medidas organizativas necesarias para garantir á cidadanía de Galicia o pleno exercicio do seu dereito ao voto.