O Sorteo Extraordinario de Lotería de Nadal celebrado este venres deixou na comarca do Val Miñor un total de 381.000 euros. O número 88.979 resultou agraciado co terceiro dos quintos premios, dotado con 60.000 euros á serie. O número foi cantado ás 10:12 da mañá, e un dos décimos foi despachado en Nigrán, no Café Bar París, Despacho Receptor Nº 86.125 situado na rúa Rosalía de Castro, 2, deixando un premio de 6.000 euros.
Ás 13:16 saía o número 58.303, agraciado co segundo premio, dotado de 1.250.000 euros á serie. Dous décimos foron vendidos na Administración Nº 1 de Nigrán, situada nas Galerías 2000 da Ramallosa, na rúa Manuel Lemos, 24, e un terceiro foi despachado na Administración Nº 1 de Gondomar, na rúa San Bieito, 3, deixando 250.000 euros en Nigrán e 125.000 euros en Gondomar.
