Trece títulos autonómicos na modalidade de contrarreloxo individual (CRI) en estrada puxéronse en xogo este mércores na localidade ourensá de Baños de Molgas.
Na categoría cadete, o baionés Brais Gómez Cima ocupou o terceiro posto da clasificación. O integrante do Ponteareas completou o percorrido nun tempo de 20:14-56, a 45 segundos de Miguel Ángel Mera (Padrones), que foi segundo, e a 1:19 minutos do gañador, Carlos Canal (Academia Postal-Actyon).
A Fundación ADO Moure Pro-Deporte, o Club Ciclista Ourensano e a Federación Galega de Ciclismo organizaron unha cita que reuniu a 280 participantes. O percorrido polas estradas de Baños de Molgas era diferente ao do 2016. Tratábase dun trazado de 11,4 quilómetros en constante ascensión.