Cita regateira este sábado en Baiona coa frota de J80 que compite na Liga de Inverno organizada polo Monte Real Club de Yates en exclusiva para estes barcos monotipos.
A partir das tres da tarde, as doce tripulacións participantes disputaranse tres novas probas na que é xa a quinta e penúltima xornada de competición. Farano nun campo de regatas situado no interior da baía, cunhas condicións meteorolóxicas que se anuncian perfectas para a navegación dos veleiros.
A previsión é que o vento sopre do nornoeste cunha intensidade que non baixará dos dez nós e que podería chegar mesmo aos dezaoito. Ademais, lucirá o sol, o que permitirá que o público que se achegue á península de Monte Boi ou ás praias circundantes poida gozar da competición con moi boa visibilidade.
A esta recta final da Liga de Inverno hai dous barcos que chegan cunha posición destacada na clasificación. Son o Okofen do vigués Javier de la Gándara, e o Miúdo by Storax da portuguesa Francisca Barros. O barco galego segue na cabeza tras gañar practicamente todas as probas disputadas ata o momento, pero o equipo luso logrou recortar distancias e na última xornada colocouse a 10 puntos do líder.
O Ferralemes de Enrique Porto e o Virazón de Miguel Lago, patroneado por Javier Rey nas últimas etapas, pelexan pola terceira posición separados por apenas tres puntos. Séguenlles na clasificación, aínda que a máis distancia, o Cansino, o Mondo, o Pazo de Cea, o Namasté, o Luna Nueva, o Marías, o Alumisel e o Náutico Cormorán.
